Decoramos o centro para o Nadal

Chegaba o Nadal e @s argalleir@s das letras puxémonos mans á obra para facer que o centro lembrase estas datas e amosar a nosa alegría porque chegaban as vacacións!!! 

Pensamos en facer debuxos, carteis..., pero non tiñamos tempo, xa que era época de exames. Solucionamos o problema pedindo axuda a profes  e a compañeir@s que non dubidaron en botar unha man. 

Grazas @s nos@s compañeir@s de 1ºFPBásica  e ás súas profes, Lara e Mª José, por axudarnos a realizar este traballo, e dicirlles que @s argalleir@s agardamos que sexan moitas máis as actividades que fagamos tod@s xunt@s. 

Pero non todo quedou aí. Como contamos coa presenza da argalleira Cristina Souto (á  que non se lle resisten nin os vídeo titoriais da súa antiga profe de plástica, Cristina), atrevémonos a gravar nós un vídeo titorial que compartimos con todos e todas vós. 

Como facer unha estrela! 

Grazas a Javi e Jorge por facer a montaxe.
Despedímonos desexándovos un BO NADAL e que todo o que desexedes para o ano que vén, se faga realidade.

AUDIOLIBROS DOS ARGALLEIR@S

Boas a todos e a todas.!

Deixámosvos co primeiro audiolibro que realizamos este curso (2017/2018) @s argalleir@s das letras. Lembrámosvos que as lecturas que realizaremos este ano no club de narrativa, seguirán as recomendacións dos "Argalleiros e Argalleiras de honra".

Aquí está a lectura que nos recomendou Begoña Martín: El señor Ibrahim y las flores del corán de Eric- Emmanuel Schmitt.

Agardamos que desculpedes todo aquilo que vos impida seguir a audición da lectura do xeito máis pracenteiro que imaxinarades, pero que saibades que gravamos en directo, e sen ningún corte, no tempo que compartimos de lecturas no club. 

Bo proveito!

@s argalleir@s das letras celebramos o último encontro do club de lectura do 2017 lendo unha obra que non estaba prevista. Foi unha sorpresa das profes, pero unha sorpresa, sorpresa, porque nos deixou a tod@s??? Elas sempre andan argallando e agasalláronnos con Los elefantes nunca olvidan de Christiane Pieper e  Anushka Ravishankar. 

Lembrade que foi unha lectura de súpeto, pero a argalleira Sara Basoa realizouna de marabilla. Escoitádea e pensade que non abrimos a derradeira páxina do libro. 

Que decidistes vós, ser elefante ou búfalo?

Boas a tod@s! @s argalleir@s comezamos coa lectura da obra: Itinerario do botellón do autor X. L. Graña (argalleiro de honra), e queremos compartir con vós este comezo, porque tedes que saber que non vos  é nada fácil distribuír os papeis que teremos que ler entre tod@s os que somos. Menos mal que algúns e algunhas argalleiras se preocuparon diso uns días antes, xa que en 20 minutos que dura o recreo...  Nunca nos atreveramos a realizar un audiolibro dunha obra teatral.... Pero como somos así, aquí vos deixamos co inicio da obra do "Argalleiro de honra", X. L. Graña.

Na segunda sesión do club de lectura, @s argalleir@s continuamos coa obra de X. L. Graña, Itinerario do botellón. Nesta sesión, o tempo de lectura foi menos porque tivemos que distribuír os papeis para poñerlle voz ao texto.
Este mércores comezamos comentado o lido anteriormente e logo comezamos a lectura:

Aquí vos deixamos a cuarta sesión da lectura

Na 5º sesión da obra de X. L. Graña, as novas voces d@s argalleir@s amosaron un pouco de nerviosismo, pero, como estabamos tod@s aí, saíu adiante.


Aquí vos deixamos a sexta sesión da obra Itinerario do botellón.


Xa podedes escoitar a sétima sesión de Itinerario do botellón.



Este mércores rematamos a lectura da obra de X. L. Graña, Itinerario do botellón. Aquí vos deixamos coa gravación.


Nesta sesión do club comezamos coa lectura recomendada pola " Argalleira de honra", e " querida profe", Efigenia Maseda. Cando nos visitou convenceunos de ler: El príncipe de Tarsis  escrita por  Antonio Sánchez - Escalonilla e hoxe comezamos, lembrándonos de Efi xa dende as primeiras páxinas. Ela  sabe o porqué.
Notaredes que houbo un momento da lectura na que dubidamos á hora de ler: " Posiblemente algunos conversación con ninguno". Ao rematar a sesión comentamos este feito.

Aquí volvemos, aínda que sempre estivemos onde tiñamos que estar nos recreos. Xa sabedes que a actividade do Día do Libro lévanos tempo e por iso non puidemos subir as lecturas que realizamos nas nosas xuntanzas. Temos que dicir que, como somos conscientes do tempo que resta para finalizar o curso, decidimos deixar a lectura comezada de El príncipe de Tarsis porque sabiamos que non seriamos capaces de rematala e comezar con algo de poesía. Xa era hora! Lembrámosvos que a recomendación do " argalleiro de honra", Héctor Cajaraville foi: Terraza de Fran Alonso. E decidimos poñernos con ela. 

Aquí vai o inicio de Terraza coa lectura das dedicatorias e os tres primeiros poemas, xa que a poesía, como todo, precisa dun tempo para comentar. 

O seguinte mércores continuamos coa lectura dos tres poemas seguintes:


E aquí estivemos hoxe lendo outros poucos poemas para logo comentalos.

O día 6 de xuño continuamos poñéndolles voz aos poemas de Terraza de Fran Alonso.

E tocaba rematar a lectura de Fran Alonso, Terraza e así o fixemos na última sesión do club deste curso.
Aquí vos deixamos coa lectura dos tres últimos poemas: " Ignoro a que dimensión", " Das árbores do parque" e " Un home cun maletín".


Boas lecturas e reparadores mergullos en cada páxina dos libros que vos acompañen durante as vacacións tan merecidas.
Ata o curso que vén!!!

PARA E POR QUE?

Os argalleir@s das letras comezamos este curso " ilusionad@s" por saber cal sería o novo reto que nos estaría esperando. E se estabamos "ilusionad@s", así seguimos, xa que nos gusta o que estamos facendo. 

Algunha vez vos parastes a ler as dedicatorias que aparecen nos libros? Pensastes en quen serían as persoas que teñen a sorte de que os agasallen cun traballo que levou tanto tempo? Por que algúns autores e autoras dedican as obras a ideas, illas....? Pois nós estamos lendo todas as dedicatorias que agochan os libros da nosa biblioteca. Moito traballo nos queda, pero ímolo levando.

AS VINTE E UNHA PLANTA CELTA PARA A NOSA ALAMEDA LITERARIA

Este ano, os argalleiros e argalleiras das letras aventurámonos nunha nova viaxe pola nosa Alameda literaria das árbores celtas. 

Desde comezos do curso estamos traballando neste proxecto con moito entusiasmo. Contarémosvos en que consiste, pero non revelaremos todos os segredos ata que rematemos. 

Primeiro, buscamos cales serían as vinte e unha plantas que tiñan presenza na cultura celta, coma xa sabiamos que a violeta, coa que agasallamos aos famosos que nos visitaron a comezos de curso para finalizar a actividade Lemos por e para vós a Antoloxía poética das árbores celtas, era unha delas, comezamos a investigar cales serían as vinte restantes.  

Seleccionamos as que iamos traballar con elas, buscamos o nome en latín, o nome en galego e algunha información sobre elas, para que as empregaban os celtas, que propiedades teñen..., aínda que algunha resistiuse e resístese. Aprendemos moito e pasámolo moi ben buscando algúns nomes e información que son imposibles!!!

Algunhas argalleiras encargámonos de debuxalas e facémolo con moita ilusión para que queden moi bonitas.

Unha historia sobre a violencia de xénero

O día 25 de novembro xa pasou, pero a violencia de xénero segue estando presente. Continúa asentada na nosa sociedade,  nas nosas vidas, nas nosas mentes... Que nos pasa? Que temos que facer para cambiar e rematar dunha vez  con esta atrocidade? Ninguén se dá conta da crueldade, brutalidade, bestialidade, barbaridade... que viven moitas mulleres? 

Por se non o tiñades moi claro, a Argalleira das letras de 4ºESO, e gran artista plástica, Cristina Souto realizou este cómic que sintetiza e reflicte mellor que ningún manual, titoría, charla.... ESTA REALIDADE. 

COMPRA SOLIDARIA

@s argalleir@s das letra non paramos. Sempre andamos ás présas e moitas veces non facemos as cousas como deberiamos, pero facémolas, que é o importante. 

O Nadal xa está aí  e sabemos que, por desgraza, aínda hai que seguir axudando a familias da nosa vila porque non están pasando un bo momento económico. Por iso decidímonos a facer a compra xa para que os responsables dos Servizos sociais do concello vaian distribuíndo os alimentos que compramos e así facerlles máis levadeira a situación a estas persoas. 

Este ano foi diferente porque a Elena e a Chelo veulle a présa. Decidiron ir no recreo  e alá fomos cos cartiños recadados dos nosos traballos. Tiñamos 131euros para gastar en alimentos de primeira necesidade e así o fixemos. 

Aquí nos vedes. Sabela, Jessica, Aldara, Silvia, Xan, Nono, Vicente e Santi como representantes de tod@s @s argalleir@s das letras facendo a compra. 

NÓS DICIMOS NON Á VIOLENCIA DE XÉNERO

Sabela, 3ºESO

TODOS E TODAS CONTRA A VIOLENCIA DE XÉNERO

Imos compartir con todos e todas vós o que levamos traballando dende hai días para BERRAR moi alto que HAI QUE PARAR A VIOLENCIA DE XÉNERO, E TODA CLASE DE VIOLENCIA, XA!
Aquí vedes o debuxo realizado por Cristina Souto ( 4ºESO) que transmite o que sentimos tod@s ante este tipo de violencia.

Os nosos relatos contra a violencia de xénero

Aquí están os relatos que nós mesmos escribimos contra a violencia de xénero, aos que poñemos voz os alumnos de 1º ESO.

Microrrelatos Violencia de Xénero

Poñemos voz aos microrrelatos que escribimos o ano pasado contra a violencia de xénero.

Revista escolar Argalladas 2016/ 2017

Compartimos a revista escolar que realizamos o alumnado do IES Castro da Uz o curso 2016/ 2017.
Agardamos que vos gusten os artigos e vos fagan pasar un bo rato.

O Samaín en coplas

Este curso, o Samaín e a "cabeza falangueira" viñeron acompañados destas coplas que fixemos os alumnos e alumnas de 1º, 2º e 3º ESO para lembrar esta data e acompañar as castañas asadas coas que nos agasallou a ANPA.

Aquí están algunhas, pero lembrade que poderedes lelas todas na revista escolar, Argalladas. 

Entrevistas en RADIO RAS

@s argalleir@s das letras comezamos coa nosa radio escolar hai moitos anos e queremos compartir con todos e todas vós algunhas das entrevistas que fomos realizando.

VII MARATÓN DE CINE

O día 5 de outubro de 2017 @s argalleir@s das letras, acompañad@s das nosas profesoras Chelo e Elena e de dúas argalleiras de 1º de BAC do IES Moncho Valcarce, antigas alumnas do noso centro, despois dunha mañá normal de clases chegamos de novo pola tarde ao instituto para realizar unha actividade especial: a sétima noite de cine.

DE TRIACASTELA A SAMOS, IMOS FACENDO O CAMIÑO

O día 25 de setembro de 2017, alumnado de todos os cursos do centro e algunhas profesoras ( Elena, Chelo, Marina L. e Mª José) subimos ao bus para dirixirnos a Triacastela, lugar no que comezariamos a etapa do Camiño de Santiago.

LEMOS POR E " GRAZAS " A VÓS!!!

O día 22 de setembro rematou a actividade que iniciaramos o curso pasado: " Lemos por e para vós a, Antoloxía poética das árbores celtas". 

Non queremos cansarvos lembrando como iniciamos este proxecto, nin tampouco como se foi desenvolvendo, porque tedes toda esta información neste blog.

O certo é que para @s argalleir@s das letras o curso escolar comezou antes do día 15. Tiñamos moito que organizar para que o día 22 todo estivese coma nos gusta a nós: BEN. Como a Elena e a Chelo non lles importou acompañarnos nos días de "descanso", e a tod@s nos movía o mesmo obxectivo,  aí estivemos no centro ( días antes do inicio do curso) preparando as nosas árbores, pensando na música, nos agasallos, en fin... en poder amosarlles o noso agradecemento a TOD@S @S ARGALLEIR@S DAS LETRAS " DE HONRA" pola súa colaboración neste proxecto.

LEMOS POR E PARA VÓS a Antoloxía poética das árbores celtas

Moitas grazas a todas as persoas que nos axudastes a levar a cabo o proxecto “Lemos por e para vós”.

Este foi un traballo arduo, laborioso, cansino, devastador..., á par que moi gratificante xa que nos abriu os ollos a como son as persoas. Comezamos entusiasmados elixindo a famosos que nós admirabamos e desexabamos que colaborasen con nós nesta nova aventura, pero... moitos; nin contestaron, outros; enganáronnos comprometéndose para ao final nunca cumprir... 

Agora ben, agradecemos a todos, os que dende hoxe serán sempre argalleiros e argalleiras das letras, o seu compromiso con nós dende o inicio, porque nos amosaron que a verdadeira fama é a humildade. Tamén están connosco os que quixeron axudarnos, pero as circunstancias impedíronllelo. 

TALLER DE GRAFFITI, ( PRIMEIRA PARTE)

Grazas ao Grupo de Biblioteca do centro (capitaneado por Elena) e ao EDLG ( coordinado por Montse) puidemos achegarnos e sentirnos auténticos artistas do graffiti.

Hoxe foi a primeira sesión do taller que nos dá o antigo alumno do centro, e un dos mellores graffiteiros actuais:  RUBÉN MOLEDO. Recomendámosvos ler a entrevista que saíu no xornal El Progreso hai uns días para coñecer un pouco máis a este artista pontés. 

Día do libro 2017 en Cáceres

 Este ano “@s argalleir@s das letras” decidimos celebrar este día en Cáceres, aínda que non só visitamos esta provincia, xa que tamén nos achegamos ata Mérida. 

(Como pronto teredes unhas presentacións de todos os lugares que visitamos, agora só vos deixamos un pequeno anticipo.)  

O día 20 chegamos tarde ao hotel de Cáceres e había que deitarse pronto para retomar forzas, xa que o día seguinte sería un día duro.

O día 21, pola mañá visitamos Mérida,  pola tarde Trujillo e, da man de Cristina, coñecemos a historia do teatro, anfiteatro e moitas máis cousas destas cidades.

Audiolibros de Carlos Casares

 @s argalleir@s das letras lembramos a Carlos Casares poñéndolle voz á súa obra. 

Como xa sabedes no club de lectura comezamos lendo a peza teatral a Laranxa máis laranxa de todas as laranxas, que nos gustou moito e nos fixo pasar momentos moi divertidos. Logo pensamos que estaría ben poñerlles voz a algunhas das obras do autor. ( Se fose agora.... NUNCA PENSAMOS QUE FORA TAN DIFÍCIL LER PARA QUE OUTRAS PERSOAS POIDAN GOZAR DAS OBRAS!!!). Aquí estamos tod@s @s argalleir@s facendo o que podemos. 

Antes de deixarvos cos nosos audiolibros queremos agradecerlle á nosa compañeira, Cristina Souto, o debuxo tan bonito que fixo de Carlos Casares. Grazas, CRIS. 

Que gocedes da obra de Carlos Casares!

ESTIVEMOS CON CARLOS NEGRO

O pasado martes, os argalleiros e argalleiras das letras tivemos o pracer de ter connosco a CARLOS NEGRO, un dos poetas galegos actuais, ao cal sorprendemos cunha entrevista para radio RAS. 

Despois  de responder a todas as nosas preguntas, saber que a SORBEIRA era a súa árbore celta e lerlle como definían os celtas ás persoas que nacían baixo a protección desta árbore: 

"A  SENSIBILIDADE. Son persoas encantadoras, alegres, desinteresadas, incansables,  amantes da vida, das emocións, do bo gusto, e mesmo dos problemas. Son apaixonadas, emocionais (dóciles ou independentes), boas compañeiras e non esquecen. A SÚA COR: GRIS CLARA". 

QUERO COMPARTIR...

Se vos preguntamos por un día que lembredes do mes de febreiro, seguro que a maioría pensaría no día 14 ( día de San Valentín) , aínda que outros e outras  responderían o día 24 ou calquera outro día. Pero o que moitos e moitas de nós non sabiamos era que o día 2 de febreiro se celebra a festa da Candeloria. Comezamos a investigar e coñecemos que esta celebración está relacionada cos celtas. Esta cultura celebraba nesta data a chegada da luz, porque o día ía gañando á noite, significaba o espertar, o renacer dos campos que podían ir preparándose xa para sementar, os mariñeiros dispoñíanse para volver saír ao mar, os paxariños xuntábanse... En fin, que volvía a vida. Seica tiñan o costume de acender unhas candeas en cada casa para celebrar a chegada da LUZ, de aí o nome de Candeloria. Se queredes saber máis sobre esta celebración podedes seguir lendo aquí.  

DÍA DA PAZ 2017

DÍA DA PAZ
O 30 de xaneiro todo o centro lembrou a necesidade de pedir que no mundo reine a PAZ.
Aquí tedes o debuxo que fixo Paula (1ºESO)

COMPARTIMOS AS NOSAS LECTURAS

Moi boas a todos e a todas!

 Nesta entrada iremos deixando as lecturas que realizamos das obras que máis nos gustaron para que todas as persoas poidades gozar delas.

Comezamos con ánimo pero no camiño fomos dándonos conta de que é moi difícil ler para os mais. De todos os xeitos imos conseguindo o noso obxectivo: poñerlle voz a obras para achegárllelas ao maior número de persoas.

Se queredes axudarnos nesta tarefa sabedes que podedes enviarnos o voso arquivo para que o incorporemos a esta sección. 

Como dicimos @s argalleir@s das letras: " LER É UN PRACER, COMPARTILO COS DEMAIS UNHA AVENTURA!"

Que gocedes!

Son Sabela Rodríguez, curso 2ºESO e elixín Bolboretas de Xabier P. Docampo, ilustrado por Xosé Cobas.

SOLIDARIOS E SOLIDARIAS CON TODOS E TODAS

Un ano máis @s “Argalleir@s das letras” e bibliotecari@s solidari@s intentamos que aos nenos e ás nenas da nosa vila non lles faltasen alimentos nestes días de Nadal. Cos cartos recadados cos nosos traballos puidemos comprarlles: leite, zumes, marmelada, pan tostado, galletas, cacao e algún turrón e doces típicos destas festas. Eles e elas teñen dereito a gozar destes días!