DÍA DO LIBRO - PORTA LITERARIA 📖📌

Unha das actividades que o equipo de biblioteca propuxo para o Día do Libro 2026 foi a elaboración dun mural na porta da biblioteca no que o profesorado expoñía os seus libros favoritos da infancia e adolescencia a carón dunha imaxe súa naquela época. Isto converteuse nun xogo para o alumnado, que tentou adiviñar (con máis e menos acerto) quen se agochaba detrás de cada portada e de cada retrato do pasado. 

Unha iniciativa con tan boa acollida que continuará decorando a entrada á nosa biblio ata o remate do curso! 

                   

📖 💭🔊 CHARLA DÍA DO LIBRO 2026💭🔊📖

Para celebrarmos o día do libro neste curso 25/26 recibimos unha visita moi especial na nosa biblioteca: a da nosa exalumna Paula Rodríguez Fornos, quen nos acompañou para explicar o proceso de creación dos seus libros recén publicados. Paula comezou a ser escritora neste instituto e achegouse para contarnos como foron os seus inicios e como estaba vivindo o feito de converterse en escritora neste último ano, así como animou aos e ás argallantes a iniciarse na escrita literaria. 

O noso alumnado tivo a oportunidade de trasladarlle dúbidas e inquedanzas sobre todo este proceso creativo e mesmo sobre as súas intencións e preocupacións literarias e mesmo gañou algún premio pola súa participación! 🏆 Grazas, Paula, polos teus consellos e a túa ilusión de volver á casa, seguímoste moi de preto! 👀❤

              

ESCAPE ROOM LITERARIO 🔎

 Xa preto do remate do Club de Lectura 25/26, e unha vez lida a obra escollida para o grupo de 3º ESO, Tres Catorce Dezaseis, de Arantza Portabales, os e as argallantes deste curso adentráronse de novo na historia para axudar a pechala a través da resolución de pistas que levaban á verdadeira culpable. Para iso, a nosa biblioteca e a radio do IES convertéronse en espazos de investigación dos diferentes retos a superar, se ben o noso alumnado demostrou estar á altura dos enigmas e descifrounos todos, conseguindo o seu obxectivo! 🔎

Proba superada e lectura ben consolidada!

                         

Proxectos de lectura 1º ESO 🕮✈

Neste segundo trimestre, pechamos as actividades de biblioteca cunha exposición sobre a lectura de E Xoel aprendeu a voar, de Marica Campo, realizada polo alumnado de 1º ESO. A rapazada achegouse a esta obra e puido, a través dela, reflexionar sobre o uso excesivo dos videoxogos e como isto nos afecta persoal e socialmente. Poñéndose na pel do protagonista, Xoel, explicaron a súa evolución ao longo da historia e detectaron perigos da adicción aos videoxogos. Para isto, crearon cadansúa maleta da viaxe, explicando que se trata dunha metáfora arredor do crecemento persoal e a capacidade de cambio cara a un ambiente máis saudable e humano. Ademais de comprender ben o sentido da obra e o seu obxectivo no lectorado, elaboraron uns traballos de alto nivel, dignos de ser expostos para toda a comunidade educativa! 

Parabéns e grazas polo voso traballo! A seguir voando da man! 🚀

   

Semana da prensa 📪

Xa no mes de marzo, celebramos a semana da prensa no IES. O equipo de biblioteca encargouse de proporcionar ao alumnado unha serie de xornais variados, de proximidade pero tamén nacionais, e de habilitar unha sección no noso espazo para a súa lectura. O alumnado achegouse a eles máis do agardado, de xeito que se decidiu achegar prensa á biblitoeca todos os mércores, coincidindo coa recepción dos exemplares do programa Prensa Escola da Voz de Galicia. 

Xa sabes, achégate todos os mércores para poñerte ao día da actualidade! 

XII MARATÓN DE CINE! 🎦

Na tarde do xoves, 26 de febreiro, e ata a mañá do venres, 27, os e as Argallantes das letras desfrutamos da XII edición da xa tradicional noite do cine do IES. Esta actividade de máis de 12 horas de proxeccións cinematográficas e convivencia grupal serviunos de punto de unión e confraternización para compartirmos experiencias e reflexións antes da próxima viaxe do club de lectura🚌🌏. O alumnado desfrutou dunha noite moi argardada e volveu ás aulas o venres cun chisco de sono pero con moitos recordos para gardar e pensando xa na seguinte maratón! 

O Equipo de Biblioteca e de Club de Lectura quere tamén agradecer ao profesorado acompañante a súa colaboración e axuda para facer posible estas actividades que tanto atraen ao noso alumnado ano tras ano! Sen vós non sería posible! 

                          

23F: Día de Rosalía! 🌹

A semana do 23F, a biblioteca preparou uns pasatempos de PidoPapas para que os argallantes puideran achegarse á figura de Rosalía máis alá dos contidos teóricos da aula. Así pois, resolveron sopas de letras, encrucilladas e enigmas que os levaron á figura da nosa escritora máis universal. Unha actividade sinxela pero que tivo moito éxito entre o noso alumnado! 

               

Entroidando! 🎉🎭

O mes de febreiro arrincou no IES cos preparativos para a celebración do Entroido. Así pois, a biblioteca colaborou co EDLG na celebración dos mandados do Meco, unha actividade que recolle unha tradición da nosa cultura. O rol da biblioteca foi servir de espazo de xuntanza para a comunidade que se uniu aos mandados cada día, polo que decoramos algunhas das nosas zonas creando un photocall de Entroido e, aproveitando a ocasión, un máis cativo para o día dos namorados. Do mesmo xeito, o alumnado volcouse nas actividades preparando elementos para o photocall. Aquí queda unha mostra destes días de celebración! 

De igual forma, aproveitamos o festival de Entroido para entregar os premios dos carteis pola paz ao estilo de Castelao ao alumnado galardoado!: 

Días da Paz🕊☮, a Ilustración🖉, Día de Castelao e da Lingua Materna

O mes de xaneiro chegou cunha chea de conmemoracións que celebrar no IES: 

• O día da Paz
• O día da Ilustración 
• O día de Castelao 
• O día da lingua materna

Desde o Equipo de Biblioteca propúxose unha actividade para recoller todas estas efemérides nun único proxecto: a creación de carteis ilustrados arredor de inxustizas sociais actuais, en galego, ao xeito das Cousas de Castelao. Así pois, lanzouse un certame de creación ao que tamén se sumou o EDLG do centro que, logo de ver as creacións do alumnado, decidiu outorgar dous accésit pola defensa da lingua propia. Todos os carteis foron expostos na biblioteca para achegarllos á comunidade educativa do IES. Finalmente, o xurado seleccionou os seguintes finalistas, agasallados con diplomas, vales para a cafetería e unhas chapas creadas no Polo Creativo co logo do centro, o da paz e a silueta de Castelao: 

• 1º premio: Lara Ameneiro Estrada, 1º ESO
• 2º premio: Erea Caaveiro Otero, 3º ESO
• 3º premio: Sergio Franco Otero, 3º ESO 

ACCÉSITS EDLG: Emma Vargas Fernández (1º ESO) e Irea Murado Ferreiro (3º ESO). 

Parabéns a todos e grazas por participar! 

Amigo invisible de libros 📚🎁

Para pechar o primeiro trimestre, e como xa é tradición no noso IES, botamos a andar, a comezos de mes, o amigo invisible de libros na nosa biblioteca. Durante as primeiras semanas colocamos unha urna para que quen quixera participar anotara o seu nome nun papel. Á volta da ponte da Constitución, o Equipo de Biblioteca sorteou os cruzamentos de amigos invisibles e avisou a cada persoa de quen era o seu amigo invisible, para que puidera escollerlle un libro da biblioteca a fin de prestarllo durante o descanso de Nadal. 

Outras das tarefas do profesorado do Equipo de Biblioteca foi asesorar aos e ás participantes sobre os gustos ou desexos de lectura do/a seu/súa amigo/a invisible, ademais de rexistrar, gardar e envolver os libros para logo agasallalos o venres, 19 de decembro, como colofón das actividades de Nadal da biblioteca. Ademais, elaborouse unha árbore de libros que presidiu a entrega dos agasallos. 

Coma nos anos anteriores, foi unha actividade moi gratificante e que tanto alumnado como profesorado desfrutou compartindo e descubrindo, tamén, quen agasallara a quen. 

Pechamos aquí o trimestre, moi agradecidas do traballo e colaboración de toda a comunidade educativa coas actividades de biblioteca!